1 མཱ་ཤི་ཀ་ཡེ་ཤུའི་ཐོག་ནས་དཔག་ཏུ་མེད་པའི་ཚེའི་ཞལ་ཆད་བཞིན་དུ།

དཀོན་མཆོག་གི་ཐུགས་དགོངས་ལྟར་མཱ་ཤི་ཀ་ཡེ་ཤུའི་སྐུ་ཚབ་ང་པའུ་ལུ་ཡིས།

2 གཅེས་པའི་བུ་ཐི་མོ་ཐེ་ལ་འཕྲིན་ཡིག་འདི་ཕུལ་ལོ།

ཡབ་དཀོན་མཆོག་དང༌།

མཱ་ཤི་ཀ་ཡེ་ཤུ་ང་ཚོའི་གཙོ་བོ་ནས་ཐུགས་རྗེ་དང༌།

བྱམས་པ།

ཞི་བདེ་ཁྱེད་ལ་འཐོབ་པར་གྱུར་ཅིག

3 ངས་དཀོན་མཆོག་ལ་བཀའ་དྲིན་ཆེ་ཞུ་སྟེ་སྔར་གྱི་མེས་པོ་ལྟར་སེམས་བཟང་པོས་དཀོན་མཆོག་ལ་ཞབས་ཏོག་བྱེད།

སྨོན་ལམ་འདེབས་དུས་ཁྱེད་ཉིན་མཚན་མེད་པར་དྲན།

4 སྔར་ཁྱེད་དང་ཁ་བྲལ་དུས་ཀྱི་སྐྱོ་གདུང་གི་མིག་ཆུ་དྲན་པས་རང་སེམས་དགའ་བས་མྱོས་ཕྱིར་ཁྱེད་མཇལ་བར་ཤིན་ཏུ་འདོད།

5 ཁྱེད་ཀྱི་བཅོས་མིན་གྱི་དད་པ་དེ་དྲན།

ངས་དད་པ་དེ་ནི་དང་པོ་ཁྱེད་ཀྱི་རྨོ་བོ་ལོ་ཨེ་སི་དང༌།

ཡུམ་ཡུ་ནི་ཀེ་གཉིས་ཀྱི་སེམས་ལ་ཡོད་པ་དེ་ཁྱེད་ཀྱི་སེམས་ལའང་ཡོད་པ་ཐེ་ཚོམ་མེད་པར་ཤེས།

6 དེའི་ཕྱིར་ངས་ལག་པ་འཇོག་པའི་སྒོ་ནས་ཁྱེད་ཀྱི་ནང་ན་ཡོད་པའི་དཀོན་མཆོག་གི་གནང་སྦྱིན་དེ་མེ་རོ་ལྟར་སླར་གསོ་བར་དྲན་སྐུལ་བྱེད།^*

7 རྒྱུ་མཚན་ནི་དཀོན་མཆོག་གིས་ང་ཚོར་གནང་བ་དེ་འཇིགས་སྣང་གི་སེམས་མ་ཡིན་ཏེ།

ནུས་མཐུ་དང་བྱམས་པ།

རང་ཉིད་བཅུན་པའི་སེམས་བཅས་ཡིན་ནོ། །

8 དེའི་ཕྱིར་ང་ཚོའི་གཙོ་བོ་ལ་དཔང་པོ་བྱེད་པའི་ཆེད་དང༌།

མཱ་ཤི་ཀའི་བཙོན་པར་གྱུར་བ་ངའི་ཕྱིར་གནོང་འགྱོད་མ་བྱེད།

དཀོན་མཆོག་གི་ནུས་མཐུ་ལ་བརྟེན་ནས་འཕྲིན་བཟང་གི་དོན་དུ་ང་དང་མཉམ་དུ་སྡུག་བསྔལ་མྱོང་དགོས།

9 ང་ཚོས་བྱས་པའི་ལས་ཀྱི་རྐྱེན་གྱིས་མ་ཡིན་པར།

རང་གི་ཐུགས་དགོངས་དང་ཐུགས་རྗེའི་རྐྱེན་གྱིས་དཀོན་མཆོག་གིས་ང་ཚོ་བསྐྱབས་ནས་དམ་པའི་སྤྱོད་ལམ་སྐྱོང་བར་བོས་གནང་མཛད།

ཐུགས་རྗེ་དེ་ནི་འཇིག་རྟེན་མ་བཀོད་པའི་གོང་ནས་མཱ་ཤི་ཀ་ཡེ་ཤུ་བརྒྱུད་ང་ཚོར་གནང་བ་ཡིན།

10 དེ་ཡང་ད་ལྟ་ང་ཚོའི་སྐྱབས་མགོན་མཱ་ཤི་ཀ་ཡེ་ཤུ་འབྱོན་པའི་སྒོ་ནས་ཐུགས་རྗེ་དེ་མངོན་པར་མཛད།

འཆི་བ་མེད་པར་མཛད་ནས།

འཕྲིན་བཟང་བརྒྱུད་དཔག་ཏུ་མེད་པའི་ཚེ་དང་མི་འཇིག་པ་མངོན་སུམ་དུ་གནང༌།

11 འཕྲིན་བཟང་དེའི་དོན་ལ་ང་ནི་སྒྲོག་མཁན་དང༌།

སྐུ་ཚབ།

སློབ་དཔོན་ལ་བསྐོས་པ་ཡིན།

12 དེའི་ཕྱིར་སྡུག་བསྔལ་འདི་ཙམ་མྱོང་ཡང༌།

ང་ལ་གནོང་འགྱོད་མེད།

གང་ཡིན་ཟེར་ན།

ངས་སུ་ལ་དད་པ་བྱས་པ་དེ་ངོ་ཤེས་ཤིང༌།

གཙོ་བོའི་སླར་འབྱོན་པའི་ཉིན་མོ་དེའི་བར་དུ་ངས་ཁོང་ལ་གང་བཅོལ་བ་ཁོང་གིས་སྲུང་ཐུབ་པ་ཐེ་ཚོམ་མེད་པར་ཤེས་སོ།

13 མཱ་ཤི་ཀ་ཡེ་ཤུ་ལ་བརྟེན་ནས་དད་པ་དང་བྱམས་སེམས་ཀྱིས་ང་ལས་ཐོས་པའི་བསྟན་པ་ཡང་དག་པ་དེ་བརྟན་པོར་ཟུངས་ཤིག

14 ང་ཚོའི་ནང་དུ་བཞུགས་པའི་དམ་པའི་ཐུགས་ཉིད་ཀྱི་སྒོ་ནས་ཁྱེད་ལ་སྔར་གཏད་པའི་བདེན་པའི་བསྟན་པ་དེ་སྲུངས་ཤིག

15 ཕི་གེལ་ལུ་དང་ཧེར་མོ་གེ་ནཱེ་གཉིས་ཀ་ཚུད་པའི་ཨེ་ཞེ་ཡཱ་ཞིང་ཆེན་ལ་ཡོད་པའི་དད་ལྡན་པ་ཐམས་ཅད་ཀྱིས་ང་བསྐྱུར་བ་ཁྱེད་ཀྱིས་ཤེས།

16 གཙོ་བོས་ཨོ་ནེ་སི་ཕུ་རུ་ཡི་ཁྱིམ་ལ་ཐུགས་རྗེ་གནང་བར་ཤོག

ཁོང་གིས་ང་ལ་ཐེངས་མང་སེམས་གསོ་བྱས་ཤིང༌།

ང་བཙོན་པ་ཡིན་པར་ངོ་མི་གནོང་བར།

17 རོ་མཱ་གྲོང་ཁྱེར་ལ་སླེབས་རྗེས་བརྩོན་སེམས་ཀྱིས་ང་བཙལ་ནས་རྙེད།

18 གཙོ་བོའི་སླར་འབྱོན་པའི་ཉིན་མོ་དེར་གཙོ་བོས་ཁོང་ལ་ཐུགས་རྗེ་གནང་བར་ཤོག

ཡང་ང་ཨེ་ཕེ་སུ་གྲོང་ཁྱེར་ལ་ཡོད་དུས་ཁོང་གིས་ང་ལ་རོགས་རམ་ཇི་ཙམ་གནང་བ་ཁྱེད་ཀྱིས་ལེགས་པར་ཤེས་སོ། །